راجع مرفوع الراس ودموع العين صامتة
راجع واقف على رجل انكسرت من غلطة
فاتح صدرى للدنيا اللى صابتها بطلقه
بنزف ونزيفى لوّن ايدى ورسمى وبكره
مجروح والآه فى شفايا
وايدى مليانة بدامايا
شايل احزان جوايا
راجع واقف وبقول اه يا دنيا يا خاينه
راجع واقف وبقول ايامك باينة
بس جراحك ليه مش زيك دايما هاينة
راجع رافع راسى وبقولك انا لسه بعيش
راجع رافض موتى وطعنك جارح ولا هزنيش
راجعلك وتوبى ذكرى بتقتلنى .. والجانى مفيش
يا لئيمة وللحب غريمة وقاتله لعزيمة قلبى
اه يا خداعه بشكل وداعه بتقفل دربى
اه يا نصابه يا ام ديابه بياكلوا غلابة اهلى
شوفوا منظر واحد ضاع فى الدنيا عامل ايه
واقف مكسور جناحاته وحلمه اتعذب طول لياليه
صدره المفتوح وفيه تلات طلقات تعرفوا من ايه؟؟
طلقه غدر وطلقه خيانة وطلقه من الكدب بتقتل فيه
دمه ملون كله اماله وعيونه مرسومة بحزن عاش يخفيه
مجروح ويقول انا اهوة عايش بنزف ولا اتهديت
مجروح بينادى باعلى الصوت " هاتى جراحك تانى ياريت "
بطل الاحلام عاش من يومه للحلم بناله دنيا وبيت
عيشته الاحلام قرب واغرف خدلك حبه ماتقولش ياريت
لولا حلمه برىء فى وسط طريق غدره طباعه
كان مات وفات عليه اوقات منسى وشحات ... مالكل باعه
