خايف عليكى يا مصر من سنان الديب
خايف عليكى
وبسأل جراحنا امتى تطيب
ولا الجراح ما بتنتهيش
خايف عليكى ينسوا عرقك فوق جبينك
خايف يهون لونك وطينك
خايف اضيع انا من يمينك
وتروحى منى ما ترجعيش
خايف يدوسوا عليكى و عليا
وانا منك وطول عمرك بتعيشى فيا
لو اتقتلى يا بلدى ليك دية !!
ولا هيتدفع تمن مفيش
وقالوا الكتير لو يعدى يهون معاه القليل
وانا اتجرحت كتير يا بلدى
وبسال على ايه باقى القليل ؟
على موتى باقى القليل !!
ولا السكوت هيموت خلاص
وكرامتى ترجع شىء جميل
رخص التراب وسمار عينيك
وفى التاريخ بصمة ايديكى
ليه كل ساعه يذموا فيكى
مع ان زيك ما تلاقيش
قالوا الطيابه دى اصل فينا
و الحنان ساكن عينينا
بيسكتونا وياكلوا فينا
فوقى يا بلدى وما تخافيش
خايف عليكى والله خايف
وخايف والظلم بعينى شايف
خايف تموت فينا الشفايف
ونيجى ننطق ما تقوميش
ليست هناك تعليقات:
إرسال تعليق
اترك تعليقك